Ísland í fremstu röð: Fjölbreytt atvinna og öflugt efnahagslíf

 -Margar ástæður til að kjósa Íslandshreyfinguna

Kosningar eiga að snúast um framtíðarsýn. Það er ekki hlutverk stjórnmálamanna að koma með lausnir heldur skapa besta umhverfið til að samfélagið dafni. Engu að síður verða stjórnmálamenn að hafa frumkvæði, jákvæða stefnu og skýra framtíðarsýn svo að fólkið geti valið. Eftirfarandi er framtíðarsýn Íslandshreyfingarinnar í atvinnu- og menntamálum.
Virkjum frumkvæði fólksins
Íslandshreyfingin vill fjölbreytt, framsækið, skapandi og réttlátt samfélag. Samfélag þar sem frelsi einstaklingsins, menntun og möguleikar tryggja lífsgæði fólksins. Samfélag þar sem börn, öryrkjar og aldraðir eru ekki afgangstærðir. Samfélag þar sem ríkidæmið skapast af hugviti og frumkvæði fólksins  en ekki miðstýrðri forsjárhyggju ríkisins. Það hvetur til stofnunar arðbærra fyrirtækja sem virkja mannauðinn. Aðeins með öflugu atvinnulífi getum við rekið ábyrgt og sveigjanlegt velferðarkerfi.
Öflugt menntakerfi – fyrir alla
Öflugt og fjölbreytt atvinnulíf byggir á því að innviðir samfélagsins séu traustir.  Eitt helsta verkefni stjórnvalda er að efla og treysta starf á öllum skólastigum, og búa í haginn fyrir öflugt nýsköpunar-, vísinda- og rannsóknastarf.
Vellaunuð störf krefjast flest sérhæfingar. Þá sérhæfingu öðlast menn með menntun. Þess vegna viljum við koma á öflugum frumkvöðlasetrum í tengslum við háskólauppbyggingu þar frumkvöðlar og sérfræðingar geta starfað hlið við hlið að nýjum arðbærum verkefnum, ásamt því að gefa fólki færi á að afla sér menntunar sem nýtist vel í heimabyggð. Miðstöð slíks Umhverfis- og auðlindaháskóla gæti best verið á Flugvallarsvæðinu.
Hagstætt skattaumhverfi
Til að efla atvinnulíf og stuðla að nýsköpun og þróunarstarfi í fyrirtækja þarf rekstarumhverfið að vera hagstætt. Við viljum einfalda rekstrarumhverfið, draga úr óþarfa flækjum, efla upplýsingagjöf og leitast við að styrkja sem best getur við nýsköpun og vöruþróun. Rekstarumhverfið á Íslandi á að vera til fyrirmyndar og bjóða betri skattakjör en nágrannalöndin til laða að öflug fyrirtæki. Málið er einfalt; lægri prósenta á hærri upphæðir gefur fleiri krónur í velferðarkassann. Öflugt atvinnulíf er forsenda þess að hægt sé reka ábyrgt og sveigjanlegt velferðarkerfi.

Engin stóriðja? Hvað þá?
Í dag vinnur innan við 1% íslendinga við stóriðju, 99% eru að gera eitthvað annað. Er ekki undarlegt að það eina sem stjórnvöld hugsa um að byggja upp sé orkufrek, mengandi stóriðja, iðnaður sem nágrannalöndin eru að reyna að losna við.
Við hugsum til framtíðar og viljum nýta náttúruna af varúð og virðingu. Við viljum ekki að 85% af orku landsins sé bundin við heimsmarkaðsverð á áli.
Nú þegar eru fjórar jarðvarmavirkjanir á Reykjanesskaga.  Það er tími til að staldra við og læra að nýta svæðin af fyrirhyggju, enginn veit með vissu hversu mikla orku þau gefa til lengri tíma. Rannsókna er þörf áður en meira er virkjað. Rannsóknir og vísindastarf á sviði orkunýtingar og umhverfismála búa yfir miklum möguleikum til atvinnusköpunar. Það leynast sóknarfæri víða.

Sóknarfæri á Suðurnesjum
Sóknarfæri á Suðurnesjum eru fjöldamörg í nýtingu náttúrunnar í líftækni og heilsutengdum afurðum svo sem bragðefnum, náttúrulyfjum og snyrtivörum. Útivistar- fræðslu og heilsutengd ferðaþjónusta sem nýtir sér nálægðina við flugvöllinn, sjóbaðstaður við Sandvík eða heilsuhæli við Kleifarvatn eru gullin tækifæri. Störf í heilsueflingu eru vellaunuð og eftirsóknarverði fyrir konur jafnt sem karla. Tækifærin eru alls staðar ef við virkjum hugvitið.

Ísland í öndvegi
Það er vegið að íslenskri náttúru úr öllum áttum.  Er ekki kominn tími til að staldra við? Það  er aðeins ein jörð og hana höfum við  að láni frá framtíðinni og okkar eigin afkomendum. Jörðin er í okkar umsjá  og við eigum að umgangast hana af umhyggju og nærgætni og fá það margfalt launað í lífsgæðum. 

Ásta Þorleifsdóttir jarðfræðingur skipar 1. sæti á lista Íslandshreyfingarinnar í Suðurkjördæmi.