Hvað skal með þingmann sem er ...veruleikafirrtur?

Ágætu Suðurnesjamenn, ég verð að segja það alveg eins og er og tæpitungulaust að mig rak í rogastans er ég las viðtal blaðamanns Víkurfrétta við Kristján Pálsson alþingismann í síðasta tölublaði Víkurfrétta.Fílabeinsturn og sýndarveruleiki
Ég veit ekki úr hvaða fílabeinsturni þingmaðurinn horfir á atvinnuástandið hér á Suðurnesjum, né heldur hvernig hann kemst inn í þann sýndarveruleika sem hann virðist vera fastur inni í. Ég held að hann hljóti að vera að tala um einhver önnur Suðurnes en þau Suðurnes sem við búum á og þekkjum. Úr fílabeinsturninum og í gegnum sýndarveruleikann sér þingmaðurinn gull og græna skóga hvert sem litið er og það drýpur smjör af hverju strái, kyn og genabættur þorskur undir hverjum steini hér á Suðurnesjum og síðast en ekki síst kona á bak við hvert tré eins og einhver sagði. Ég er mest hissa á því að þingmaðurinn skyldi ekki stinga upp á því að við færum út í strútaeldi svona sem hliðarbúgrein við þorskeldið, því strúturinn er jú frægur fyrir þann eiginleika sinn að grafa hausinn ofaní sandinn verði hann hræddur, eða ef umhverfið er að einhverju leyti óþægilegt og geta þeir sem af einhverjum ástæðum eiga erfitt með að horfast í augu við blákaldan raunveruleikann eflaust lært mikið af honum.

Þingmanni boðið inn í blákaldann veruleikann
Ágætu Suðurnesjamenn, þegar menn sjá ekki lengur skóginn fyrir trjánum og eru ekki lengur alveg vissir um það hvar þeir eru staddir í veröldinni, þá er ekkert sjálfsagðara en að gefa þeim upp lengd og breidd, það er að segja g .p.s. staðsetningu okkar hinna og að sjálfsögðu hæð yfir sjávarmáli í þeirri von að það megi verða til þess að þeir sjái hlutina í réttu ljósi og tali sama tungumál og við hin. Það er þess vegna sem mig langar til þess að bjóða þingmanninum niður úr fílabeinsturninum og út úr sýndarveruleikanum og inn í þann blákalda veruleika sem við hin búum við. Þingmaðurinn segir í viðtalinu orðrétt: “Tilfærslur á kvóta milli svæða eða jafnvel innan svæða er mikið tilfinningamál og erfitt fyrir þá sem missa atvinnuna að sætta sig við þetta. Sem betur fer hefur tekist í flestum tilfellum að finna atvinnu fyrir þetta fólk," tilvitnun líkur. Það er sjálfsagt þess vegna sem það eru ekki nema 290 manns skráðir atvinnulausir núna í október 2002 hér á Suðurnesjum og flestir þeirra sjómenn og fiskvinnslufólk og fer þeim ört fjölgandi. Það eru mörg ár síðan kvótinn fór að mestu frá Keflavík og Njarðvík segir þingmaðurinn, rétt eins og það sé löngu fennt ofaní í þau feilspor okkar Suðurnesjamanna og það teljist ekki lengur til vandamála.

Atvinnugrein sem ekki endurnýjar sig mun deyja út
Alvarlegasta og nýjasta dæmið er flutningur kvótans frá Sandgerði en þar er verk að vinna að endurheimta hann til baka, segir þingmaðurinn, það verður sjálsagt brugðist við með sama leifturhraða og krafti og gert var í Keflavík og Njarðvík á sínum tíma, eða hvað? Þingmaðurinn kýs að velta sér upp úr tölfræðinni þegar hann talar um kvótastöðuna hér á Suðurnesjum sem sagt heildarkvótinn hefur ekki minnkað og það þýðir að hans mati að þá sé allt í stakasta lagi.
Hann gæti rétt eins sagt okkur að þessi sé 3 - 5 % meira eða minna dauður en hinn. En eins og öllum er kunnugt hefur Grindvíkingum með dugnaði sínum og áræði tekist að halda sínum hlut og vel það og í flestum tilfellum hefur þeim tekist að standast ítrekaðar árásir stór útgerðanna sem allt vilja gleypa. Færri störf í sjávarútvegi má miklu frekar rekja til þess að aflaheimildum er safnað á færri báta nú en áður segir þingmaðurinn og má það að einhverju leyti til sannsvegar færa, en aðalástæðan er auðvitað sú eins og þingmaðurinn hlýtur að vita að það er ekki gert ráð fyrir nýliðun af neinu tagi í
fiskveiðistjórnarkerfinu, öðru nær, nýliðun er nánast bönnuð að minnsta kosti fyrir venjulegt fólk og þá er ekki von á góðu, eða hvað? Það er alveg með ólíkindum að Sjálfstæðisflokkurinn sem byggir stefnu sína fyrst og síðast á því að verja skuli sjálfstæði
einstaklingsins og einstaklingsframtakið skuli standa fyrir slíkri einokunar- og haftastefnu eins og raun ber vitni. Það er líka alveg morgunljóst að atvinnugrein sem ekki endurnýjar sig með eðlilegum hætti hlítur að deyja út, alveg eins og t.d. þjóð sem ekki fjölgar sér, hún deyr að sjálfsögðu út.

Kyn- og genabættur þorskur annars flokks vara
Mig langar til þess að benda þingmanninum á það að fiskmarkaðirnir sem eru vissulega mjög mikilvægir, eiga líka undir högg að sækja samanber Fiskmarkað Suðurnesja sem er jú nærtækt dæmi en þar var hvorki meira né minna en 16% samdráttur á fyrstu 6 mánuðum þessa árs, við höfum lítið við fiskmarkaði að gera ef það er engan fisk að fá til að selja. Fiskvinnslan á Suðurnesjum er vissulega mjög sérhæfð og byggir á miklu markaðsstarfi, en á líka undir högg að sækja vegna mjög mikils hráefnisskorts, svo mikils að jafnvel mjög mikilvæg markaðssambönd kunna að glatast, auk þess sem stórir söluaðilar hér á landi hafa verið að undirbjóða eðlileg verð á mörkuðum erlendis. Ef ekkert úr rætist á næstunni þurfa fiskverkendur bæði í ferskfiski og saltfiski mjög líklega að draga saman seglin og jafnvel segja upp fólki. Þingmaðurinn talar einnig um þorskeldismöguleika framtíðarinnar og vitnar í frændur vora og vildarvini Norðmenn, sem fara þar að sjálfsögðu hamförum eins og í öðru sem þeir taka sér fyrir hendur, ég held að ég geti sagt það fullum fetum að kyn- og genabættur eldisþorskur verður alltaf annars flokks vara miðað við villtan þorsk sem elst upp í okkar óspilltu nátturu og við getum vonandi sótt á okkar fengsælu fiskimið allt í kringum landið hér eftir sem hingað til. Það er nefnilega þannig sem betur fer að neytendur út um allan heim vilja ekkert frekar en villibráð sem elst upp við eðlilegar aðstæður úti í nátturunni og eru tilbúnir að borga mun hærra verð fyrir vöruna séu þeir þess fullvissir að hún sé ekta.

Amerískir hamborgararassar
Hinsvegar hafa neytendur alltaf að einhverju leyti vantreyst t.d. eldisfiski vegna þess að þeir hafa í raun ekki hugmynd um á hverju hann er alinn. Mjög gott dæmi um kyn- og genabætta matvælaframleiðslu má t.d nefna ameríska nautakjötið, við höfum öll heyrt talað um að Ameríkanar séu með hamborgararassa og er það rakið beint til hormónabætta nautakjötsins, þegar að maður sér aftan á suma Ameríkana t.d í sjónvarpinu eða í bíó, getur maður vart greint á milli þess hvort maður horfir á afturendan á nauti eða manneskju, ef við heimfærum þetta t.d. yfir á hormónabættan eldisþorsk þá er ég ansi hræddur um að framtíðarneytenur eldisþorsksinns yrðu frekar
ósáttir við það ef það færi t.d. að vaxa á þá bakuggi, eða hvað heldur þú ? Ég vil endilega skora á þingmanninn að verja þeim peningum sem hann ætlar að nota til þess að byggja varnargarða fyrir þorskeldið frekar til þess að byggja hér aftur upp blómlegan
sjávarútveg á Suðurnesjunum öllum, skapa hér aðstæður fyrir eðlilegri nýliðun þá kemur það að sjálfum sér að hafnarmannvirkin sem við eigum hér komast aftur í eðlilega notkun og fara að skila þeim arði sem til var ætlast í upphafi.

... þið hafið jú herinn!
Það er í rauninni hjákátlegt ágætu Suðurnesjamenn að þingmaðurinn skuli segja: Svo höfum við flugvöllinn og herinn, takið eftir og herinn, rétt eins og stjórnmálamenn fyrri tíma bentu okkur gjarnan á þegar við Suðurnesjamenn vildum sækja rétt okkar gagnvart
stjórnvöldum hér fyrr á árum, þeir sögðu einmitt þetta, hvað eruð þið að væla, þið hafið jú herinn. Herinn og flugvöllurinn er eitthvað sem fer ekki annað segir þingmaðurinn, rétt eins og hann viti ekki að aðalstöðvar flugsveitarinnar sem hér dvelur hafa nýlega verið fluttar til Þýskalands og sterklega kom til greina að flugsveitin yrði líka flutt héðan og þar með 60 % af starfsemi Varnarliðsins og því var í rauninni bara frestað vegna mótmæla íslenskra stjórnvalda en getur rétt eins komið upp aftur hvenær sem er. Við vitum að flugvöllurinn fer ekkert, það liggur í augum uppi en við vitum líka að Flugleiðir sem veita fjölda manns atvinnu hér á Suðurnesjum berjast fyrir tilveru sinni frá degi til dags og getur sú barátta í rauninni farið á hvorn veginn sem er þó svo við vonum að sjálfsögðu það besta fyrir þeirra hönd. Það sama má kannski segja um öflug verktakafyrirtæki sem sem starfað hafa mikið fyrir herinn á Keflavíkurflugvelli en þurfa nú að starfa í allt öðru umhverfi hvað varðar verkefni og afkomumöguleika. Auk þess sem ég hef tíundað hér að framan er okkur auðvitað kunnugt um það að fjölmörg minni verslunar- og iðnaðarfyrirtæki hafa því miður lagt upp laupana upp á síðkastið hér á Suðurnesjum og lái mér hver sem vill þegar mér blöskrar málflutningur þingmannsins og lýsingar hans á atvinnulífinu hér á Suðurnesjum, séðar úr fílabeinsturni og gegnum sýndarveruleika hans.

Krefjum frambjóðendur um ábyrga stefnu
Góðir Suðurnesjamenn, hvar í flokki sem þið standið, í vor göngum við til alþingiskosninga og nú er tækifærið til þess að krefja frambjóðendur um ábyrga stefnu í atvinnumálum okkar, það er mín skoðun að fyrningarleið Samfylkingarinnar gangi aldrei upp, kvótakerfið er komið til að vera og í rauninni verður ekki aftur snúið með það.
En það á að vera okkur bæði ljúft og skylt að sníða af því agnúana, að breyta því þannig að þjóðin geti öll búið við það í sátt og samlyndi, eins og ég hef sagt áður, gera nýliðun ekki bara mögulega fyrir venjulegt fólk heldur auðvelda, að auka veiðiskylduna upp í
80%, því þeir sem ekki veiða kvótann sinn eiga hreinlega ekki að fá neinn kvóta, það eru nógir aðrir sem vilja og geta veitt hann, það má rýmka verulega möguleika til þess að skipta á milli tegunda til þess auka möguleika á hagræðingu. Til þess að breyta þessu þarf ekkert annað en vilja og skilning stjórnmálamanna því þetta er nú allt þegar
upp er staðið bara pólitík og það eru nefnilega við sem bæði ráðum og rekum stjórnmálamennina, ekki gleyma því. Við Suðurnesjamenn höfum ekki efni á því að hafa í vinnu hjá okkur þingmenn sem ekki eru tilbúnir til þess að horfast í augu við vandamálin og leysa þau.
Núna er röðin komin að okkur, það er alfarið á okkar ábyrgð hverjum við treystum best til þess að breyta því sem þarf að breyta í fiskveiðistjórnarkerfinu og gæta hagsmuna okkar í hvívetna næstu fjögur árin.
Þess vegna skulum við vanda valið sem aldrei fyrr þegar við kjósum í vor og láta alla flokkadrætti lönd og leið en velja heldur þá einstaklinga sem við getum best treyst til þess að gæta okkar dýrmætu hagsmuna.

Með baráttukveðju:
Ástþór Bjarni Sigurðsson sjómaður