Húrra, húrra!

Um síðustu helgi tilkynnti Siv Friðleifsdóttir, heilbrigðisráðherra, þá ákvörðun sína að heimila byggingu 174 nýrra hjúkrunarrýma á landinu.  Dreifast þau um landið eftir þörfum.  Til Suðurnesja koma 30 ný hjúkrunarrými.  Þar með er í höfn eitt brýnasta úrlausnarverkefni okkar – að svara vaxandi þörf fyrir hjúkrunarrými.

 

Talan 30 er í samræmi við það sem talið er ásættanlegt til að bregðast við þörfinni.  Þessum 30 hjúkrunarrýmum verður ætlaður staður á Nesvöllum – nýja svæðinu milli Stapa og Samkaupa.  Þar mun rísa ein glæsilegasta þjónustubyggð á landinu og gegna hjúkrunarrýmin 30 þar lykilhlutverki.  Jafnframt skapast nú svigrúm til að bæta aðstöðuna á Garðvangi og Hlévangi.  Stefnan er vitaskuld sú að í hverju herbergi séu ekki fleiri en ein manneskja (eða hjón).

Stefna stjórnvalda er sú að fólk geti dvalið sem lengst heima. Í því skyni hefur heimahjúkrun verið aukin til muna að undanförnu.  Samhliða er bætt úr hjúkrunarrýmum og þjónustustig við eldri borgara almennt aukið.  Tilkynning um 30 ný hjúkrunarrými á Suðurnes er mikilvægt skref í átt að enn betra samfélagi á Suðurnesjum.  Því ber að fagna.

Hjálmar Árnason,
alþingismaður.