Hræddir við lýðræðið

Á síðasta bæjarráðsfundi hafnaði meirihluti bæjaráðs Reykjanesbæjar ósk Framsóknar um að fá að tilnefna áheyrnarfulltrúa í sex nefndir þrátt fyrir skýrar heimildir í samþykktum Reykjanesbæjar og Sveitarstjórnarlögum.

Í stefnuskrám allra framboða við síðustu kosningar komu fram  áherslur á aukið lýðræði og gagnsæi. Undirritaður telur að það hefði verið í fullu samræmi við þær áherslur að veita Framsókn áheyrnarfulltrúa í sex fastanefndir sveitarfélagsins. Nú kýs nýr meirihluti  strax í upphafi kjörtímabilsins að ganga á bak kosningaloforða sinna um aukið íbúalýðræði, opnari og gagsærri stjórnsýslu og aukin áhrif íbúa á nærumhverfi sitt. Þetta er heldur ekki í samræmi við orð og óskir forseta bæjarstjórnar Reykjanesbæjar um að allir vinni saman.

Þeir einstaklingar sem gáfu kost á sér og tilnefndir voru sem áheyrnarfulltrúar Framsóknar í nefndum eru allir með brennandi áhuga á samfélaginu og tilbúnir að vinna að því að gera Reykjanesbæ betri og meiri. Þessu vinnuframlagi hafnar meirihluti Beinnar leiðar –fyrir fólkið á bænum, Samfylkingar og Nýs afls.

Fordæmi eru fyrir áheyrnarfulltrúum í öllum stærri sveitarfélögum og er því óskiljanlegt að nýr meirihluti skýlir sig á bak við rök sem ganga þvert á stefnuskrá þeirra.

Eftir að hafa skoðað samþykktir og haft samband við sveitarstjórnarfulltrúa í fjórum  sveitarfélögum  er niðurstaðan að almenna reglan er sú að heimila áheyrnafulltrúa minnihluta.  Sjá eftirfarandi töflu.

Eru fordæmi fyrir áheyrnarfulltrúa í bæjarráði og nefndum?

Sveitarfélag	Bæjarráð	Nefndir
Kópavogur	Já	Já
Reykjavík	já	já
Hafnarfjörður	já	já
Akureyri	já	já

 

Þetta má staðfesta með því að lesa samþykktir viðkomandi sveitarfélaga.

Samkvæmt sveitarstjórnarlögum og samþykktum Reykjanesbæjar er heimilt  að tilnefna áheyrnarfulltrúa og varamenn þeirra í ráð og nefndir.  Svo virðist að meirihlutinn sé hræddur við lýðræðið sem hann talaði fjálglega um í kosningaloforðum sínum. Með því að hafna sjálfsögðum rétti Framsóknar fellur hann á fyrsta prófinu. Traðkar á lýðræðinu. Upphafið lofar ekki góðu.

Kristinn Þór Jakobsson

Bæjarfulltrúi Framsóknar í Reykjanesbæ