Háskólinn í Reykjanesbæ?

Það eru forréttindi að fá að skipa sæti á framboðslista Sjálfstæðismanna í Reykjanesbæ til sveitarstjórnarkosninganna sem fram fara 25. maí nk. Ég fullyrði að sjaldan eða aldrei hefur verið jafn breiður og góður hópur í framboði fyrir flokkinn og nú, og sjaldan eða aldrei hefur okkar ágæta sveitarfélag verið betur undir það búið að nýta tækifærin ef við höfum rétta fólkið til þess. Það höfum við.Með einsetningu skólanna sýndi bæjarstjórnin að hún er ekki hópur blaðrara sem tala fjálglega um gildi menntunar og að börnin séu framtíðin við hátíðleg tækifæri en sker svo niður æ ofan í æ í þessum málaflokki.

Skrefið stigið til fulls

Skoðun mín er sú að hér sé staðið að menntun á grunnskóla- og framhaldsskólastigi af myndugleika. En sá málaflokkur sem vekur hvað mestan áhuga minn er að tengja nám á háskólastigi sem mest Reykjanesssvæðinu. Nú stunda milli 50 og 60 nemendur nám á háskólastigi í Reykjanesbæ, en Háskólinn á Akureyri hóf hér kennslu árið 2000 í samvinnu við Miðstöð símenntunar og eru 3 námsgreinar í boði; rekstrarfræði, hjúkrunarfræði og leikskólakennaranám.
Með tilkomu „umhverfisvæns orkugarðs“ er mögulegt að hér verði hægt að byggja upp öflugar háskóladeildir sem sérhæfi sig í orku- og jarðvísindum. Staðsetning í landi Reykjanesbæjar er kjörin til slíkrar rannsóknarvinnu þar sem saman fara gott byggingarland, vatn og orka úr iðrum jarðar sem og gott samgöngunet bæði innan lands og utan. Það er vel þekkt erlendis að starfræktir séu skólar sem nefndir eru „polytechnics-skólar“, en þeir sérhæfa sig á ákveðnu sviði menntunar. Ég tel að í framtíðinni gæti verið mögulegt að við hefðum hér menntastofnun sem sérhæfði sig á sviði orku- og jarðvísinda. Sem dæmi um „polytechniscs-skóla“ hér á landi eru Bifröst, Háskólinn í Reykjavík og Háskólinn á Akureyri. Kennaraháskóli Íslands félli líka undir þessa skilgreiningu. Þetta eru ekki „universities“ samkvæmt alþjóðlegum stöðlum heldur „polytechnics-skólar“ þar sem námsframboð er sértækt og takmarkað við ákveðin svið. Í tengslum við stofnun af þessu tagi og orkugarðinn kæmi til með að skapast fjöldi starfa á sviði menntunar og vísinda. Mér finnst því ekkert fáranlegt að hér risi sértæk menntastofnun, eins og hér á undan var lýst, og leyfi mér því að setja fram hið háleita markmið um „Háskólann í Reykjanesbæ“. Eða er það eitthvað raunhæfara að slíkar stofnanir þrífist betur á Bifröst eða Akureyri en hér í Reykjanesbæ?

Þekkinguna heim

Sem háskólanema finnst mér sorglegt að fæstir þeir Reyknesbæingar sem stunda nám á háskólastigi koma með þekkingu sína hingað í sveitarfélagið að námi loknu. Auðvitað ræður atvinnuframboð einhverju um þetta og tegund þeirrar atvinnu sem í boði er. En þetta er ekki náttúrulögmál og vel má bæta úr þessu. Við sjálfstæðismenn viljum og munum beita okkur fyrir því að sveitarfélagið og fyrirtæki í bænum bjóði fram lokaverkefni fyrir þá stúdenta sem eru að ljúka sínu háskólanámi. Hér er af nógum slíkum verkefnum að taka á margvíslegum sviðum og með þessum hætti gæfist sveitarfélaginu, fyrirtækjum og stúdentum kostur á að flytja þekkinguna heim.



Virkjum mannauðinn og höldum fram á veginn

Við Reyknesbæingar búum yfir miklum mannauð, um það efast enginn, en við verðum að virkja mannauðinn til að tryggja að sveitarfélagið okkar standi í fremstu röð. Að flytja nám á háskólastigi til bæjarins hefur nú þegar verið gert með ágætum árangri. Við höfum plægt akurinn og sáð fræjunum. Þar sem fræi er sáð vex með tímanum tré. En við verðum að vökva og hlúa að fræjunum á viðkvæmasta skeiðinu ætlum við að uppskera eins og sáð var til. Ég hvet bæjarbúa til að ljá D-listanum atkvæði sitt í komandi kosningum því í raun snúast kosningarnar um það hvort menn kjósi afturför eða framför. Ég veit hvað ég kýs. Ég kýs framför. Ég kýs D-lista, sjálfstæðismanna.




Guðfinnur Sigurvinsson
Höfundur skipar 13. sæti á D-lista Sjálfstæðisflokksins við sveitastjórnarkosningarnar í Reykjanesbæ.