Greiða ekki tjón á bílum sem skemmast á holóttum Flugvallarvegi

Eins og allir bæjarbúar Reykjanesbæjar hafa tekið eftir eru margar götur bæjarins að undanskildri Hafnargötunni orðnar heldur betur götóttar og hef ég hugað mér að vekja fremur athygli á því en þegar hefur verið rætt um þetta í Fréttablaðinu og Víkurfréttum.

Ég undirritaður er ungur íbúi í Reykjanesbæ og er búinn að búa hér síðan um og uppúr 2000. Hef þó að vísu haft aðsetur bæði hér og hjá móður minni sem að er búsett í Garðinum. Ég var í hinum mestu makindum að aka niður Flugvallarveginn hér í Keflavík í átt frá Húsasmiðjunni, og varð fyrir því óhappi að keyra þar í holu með þeim afleiðingum að tvær af fjórum felgum bifreiðar minnar skemmdust og dekkin á þeim einnig, þetta átti sér stað laugardaginn 7. janúar og voru þá engar merkingar um holur á þeim hluta vegarins sem að ég ók á, þó tók ég eftir því að merkingar voru í hina aksturs-stefnu vegarins!

Eftir þetta atvik hafði ég samband við bæjarskrifstofu Reykjanesbæjar og gerði eins og þeir sögðu mér og tilkynnti lögreglu óhappið. Eftir að ég hafði gefið skýrslu á Lögreglustöðinni, var mér vísað til og sagt að ræða við fulltrúa hjá Tryggingamiðstöðinni, en þeir eiga víst að höndla þessi mál fyrir Reykjanesbæ, enda er þetta tryggingamál. Þegar að ég hafði samband við þá, var mér tjáð að þeir væru eigi bótaskyldir þar sem að vegurinn hefði verið merktur og var bent á að ræða þetta frekar við einhvern á bæjarskrifstofunum. Ég geri það og tjái þeim mál mitt, og að vegurinn hafi ekki verið merktur í þá aksturs-stefnu sem að ég var að aka. Þá er mér sagt að það geti ekki verið því að þetta sé búið að vera merkt í meira en ár!

Og nú spyr ég; “Af hverju er þessi vegur búinn að vera merktur í heilt ár? Af hverju er ekki búið að gera allmennilega við veginn og malbika hann upp á nýtt, í stað þess að stofna umferð sem að ferðast um þennan veg í hættu og valda tjóni á þeim bifreiðum sem að eiga leið sína um þennan veg?” og þá er mér svarað að það sé í sífellu verið að bæta hann og laga hann. Ef að það er í sífellu verið að laga veginn, hvers vegna er hann þá í sífellu merktur?

Nú eru að lágmarki 40 bifreiðir búnar að skemma bæði felgur og hjólabúnað. Eiga eigendur allra þessa bifreiða að sitja uppi með þetta tjón? Ég er til að mynda með mjög dýrar felgur, en þær eru af gerðinni Rondell 58 og kosta sitt, og ekki eru dekkin á þeim ódýr heldur!

Ég verð að segja að fyrir mitt tilstilli er ég mjög sár, og ég skora á Reykjanesbæ að greiða þeim sem að hafa orðið fyrir tjóni á leið sinni um Flugvallaveg tjónið og láta malbika þennan veg algjörlega upp á nýtt og loka honum á meðan þær framkvæmdir eru í gangi! Ég neita að trúa að slíkt fjármagn sé ekki fyrir hendi!

Undirritaður:

Viktor Agnar Guðmundsson
18 ára íbúi í Reykjanesbæ.