Fyrirtækjadagur og ókeypis námskeið

- Vika símenntunar um land allt.

Vika símenntunar er haldin 24.-30. september 2007. Markmið viku símenntunar er að hvetja fólk til að leita sér þekkingar og minna á að öll fræðsla nýtist til góðs í lífi og starfi. Í ár verður lögð sérstök áhersla á að ná til fólks sem hefur litla formlega menntun og sérstaklega verður hugað að læsi og lestrarörðugleikum á vinnustað með markvissri kynningu og málþingi sem haldið verður í tengslum við vikuna. Menntamálaráðuneytið stendur fyrir viku símenntunar í samstarfi við símenntunarmiðstöðvarnar níu um landið og Mími símenntun á höfuðborgarsvæðinu.

Símenntunardagur í fyrirtækjum
Árlegur símenntunardagur í fyrirtækjum er miðvikudagurinn 26. september. Fyrirtæki eru hvött til að tileinka þann dag fræðslumálum starfsmanna, t.d. með því að kynna fræðslustefnu sína eða halda námskeið. Mörg fyrirtæki fá fræðsluaðila í heimsókn með kynningar eða örnámskeið. Vikan býður líka upp á tækifæri til að fá fulltrúa stéttarfélaga eða fræðslusjóða í heimsókn til að kynna fyrir starfsmönnum með hvaða hætti þau styðja við og stuðla að símenntun félagsmanna sinna. Lögð er áhersla á að fræðsluaðilar og fyrirtæki noti tækifærið og kynni námsframboð og fræðslumál almennt í Viku símenntunar. 

Ókeypis námskeið og ráðgjöf á vinnustöðum
Í tengslum við viku símenntunar munu símenntunarstöðvarnar níu um landið, og Mímir símenntun á höfuðborgarsvæðinu, bjóða upp á ókeypis námskeið og ráðgjöf á vinnustöðum. Markmiðið er að gefa fólki tækifæri til að kynna sér möguleika til fræðslu og aðstoða einstaklinga við að taka fyrsta skrefið að aukinni fræðslu.

Vika símenntunar – markviss hvatning
Vika símenntunar er stórt og árvisst verkefni þar sem fjölmargir hagsmunaaðilar eru kallaðir til samstarfs. Fyrirtæki, menntastofnanir og allir sem koma að símenntun í landinu eru hvattir til að nýta sér verkefnið til hvatningar og kynningar á því símenntunarstarfi og starfsþjálfun sem fram fer hér á landi. Menntamálaráðuneytið stendur fyrir viku símenntunar í samstarfi við símenntunarmiðstöðvarnar níu um landið og Mími símenntun á höfuðborgarsvæðinu, auk þess sem Starfsmenntaráð styrkir átakið.

Nánari upplýsingar um viku símenntunar á Suðurnesjum er á www.mss.is