Fyrirlestraröð í Garði og Sandgerði fyrir fjölskyldur og einstaklinga á erfiðum tímum

Næstu sex fimmtudagskvöld mun kirkjan í Garði og Sandgerði í samvinnu við Sveitarfélagið Garð og Sandgerðisbæ standa fyrir fyrirlestrarröð þar sem fjallað verður um brýn mál er tengjast fjölskyldum og einstaklingum á erfiðum tímum í íslensku samfélagi. Fjallað verður um fjármál, næringarfræði, hvernig hægt er að drýgja matinn, um samskiptin á heimlinu og hvernig við getum styrkt og hlúð að hverju öðru á erfiðum tímum.

Fyrsti fyrirlesturinn verður fimmtudaginn 30. október kl. 20 í safnaðarheimilinu í Sandgerði, þá mun sr.Vigfús Bjarni Albertsson sjúkrahúsprestur flytja fyrirlestur er ber yfirskriftina “Fjölskyldan og sjálfsmyndin þegar að þrengir”. Í fyrirlestrinum verður fjallað um viðbrögð fjölskyldunnar þegar tekist er á við kreppu og áfall í ljósi breyttra samfélagsaðstæðna. Mikilvægt er að kynslóðirnar geti hlúð að hver annarri og varðveitt yngsta fólkið. Fyrirlestrarnir verða haldnir til skiptis í Garði og Sandgerði. Hver fyrirlestur hefst á stuttri helgistund. Boðið verður upp á kaffi og umræður eftir hvern fyrirlestur.

Fyrirlestrarnir eru öllum opnir að kostnaðarlausu. Sérstaklega eru foreldrar og þeir sem að vinna með börnum og ungu fólki hvattir til að sækja fyrirlestrana.