Framtíðargrunnskólinn - Hvað vilt þú?

Næstkomandi laugardag verður haldið málþing um framtíðargrunnskólann á Nordica hóteli. Þingið er haldið í tengslum við vinnu á vegum menntamálaráðuneytisins um heildarendurskoðun grunnskólalaga en sú vinna hefur staðið yfir frá því í mars sl. 

Það er einstakt, líklegast í sögunni, að almenningi sé með þessum hætti gefið tækifæri til að taka þátt í samræðu um hvernig framtíðargrunnskólinn á Íslandi eigi að líta út. Nefndin um endurskoðunina hefur haft það að leiðarljósi að velferð barna og nám þeirra sé haft í fyrirrúmi. Lög um skólastarf mega ekki hamla eðlilegri og nauðsynlegri skólaþróun. Þau ættu frekar að skapa þeim sem starfa í skólunum, starfsfólki jafnt sem nemendum, raunveruleg tækifæri til að ná árangri.

Það eru fjölmörg álitamál uppi um áherslur í nýjum lögum. Grunnskólinn okkar á að bjóða upp á fjölbreytt val um námsleiðir til að mæta þörfum allra barna – hann á að vera lifandi. Þetta þýðir að árangur og gæði í skólastarfi eru ekki einungis bundin færni í bóklegum greinum, heldur ekki síður sköpunarkrafti, sjálfsþekkingu, listum, verkviti, félagslegri færni, samskipum og vellíðan.  Spurningin hér er hins vegar með hvaða hætti ný lög geti styrkt þessar áherslur.

Eitt þeirra raunhæfu viðfangsefna við endurskoðun laganna og sem þarf að ræða um er hvernig grunnskólarnir geti komið til móts við þarfir nýbúa. Framtíðarskólakerfi þarf að hafa fjölmenningarlega heildarsýn svo hægt sé að stuðla að jafnrétti allra og undirbúa alla jafnvel undir lífið.  Álitamálið er hins vegar hvort við eigum að leggja áherslu á kennslu í móðurmáli, tryggja rétt til stuðnings á móðurmáli þar til færni í íslensku hefur verið náð, eða leggja meiri áherslu á stuðning við kennslu íslensku sem annars móðurmáls. 

Samræðan sem er stofnað til á laugardag er í anda þess sem Heimili og skóli –landssamtök foreldar hafa lagt ríka áherslu á í allri sinni aðkomu að mótun skólastarfs, þ.e. að skoðanir allra þátttakenda í skólasamfélaginu, hvort sem það eru nemendur, foreldrar, skólastarfsmenn eða stjórnmálamenn, skipti máli.  Hér er þitt tækifæri til að taka þátt í mótun grunnskóla til framtíðar.

Málþingið hefst stundvíslega kl. 9.30 og stendur til 13.00  Það er öllum opið meðan húsrúm leyfir – þátttakendum að kostnaðarlausu. Skráning fer fram á www.congress.is

María Kristín Gylfadóttir

Höfundur er formaður Heimilis og skóla – landssamtaka foreldra og fulltrúi í nefnd menntamálaráðherra um heildarendurskoðun grunnskólalaga.