Flugvöllur í Lönguskerjum fásinna

Hugmyndir framsóknarmanna um byggingu nýs flugvallar á Lönguskerjum er algjörlega óraunhæfur. Fyrir utan flugtæknilega þætti sem standast ekki þá er kostnaður við byggingu slíks flugvallar um 20 milljarðar og árlegur rekstrarkostnaður um 2 milljarðar á ári. Að leggja útí slíkan kostnað með fullkominn alþjóðaflugvöll í 20 mínútna fjarlægð verður að teljast fásinna. Á næsta ári líkur framkvæmdum við tvöfalda Reykjanesbraut og verður þá byltingu á akstri milli Keflavíkur og Reykjavíkur lokið.

Þessa daganna er byrjað að flytja verkefni frá varnarliðinu yfir til íslendinga vegna reksturs Keflavíkurflugvallar. Rekstur flugbrauta og slökkviliðs verður fluttur til Flugmálastjórnar og kostnaður við þessa þætti einvörðungu er um 1.5 milljarðar á hverju ári. Ljóst er að kostnaðurinn á eftir að vaxa mikið á næstu misserum þegar annar kostnaður fellur á íslenska ríkið.

Fari flugvöllurinn úr Vatnsmýrinni er eini raunhæfi kosturinn að flytja hann til Keflavíkurflugvallar. Allar hugmyndir um nýjan flugvöll í nágrenni Reykjavíkur eru ekki einungis óraunhæfar heldur óskynsamlegar.

Viktor B. Kjartansson
Talsmaður Flugkef – samtaka um flutning innanlandsflugsins til Keflavíkur


Mynd úr kynningu Framsóknarmanna í Reykjavík.