Fær Reykjanesbær bestu kjör ?

Sjálfstæðisflokkurinn í Reykjanesbæ hefur ákveðið að svara ekki tillögum um endurkaup á fasteignum sveitarfélagsins málefnalega, heldur ætla þeir að reyna að hlægja sig frá þessu, sem er mjög sorglegt ekki síst í ljósi þess að hér er verið að fara með skattfé íbúa í Reykjanesbæ til spillis og hægt að gera betur eins og útreikningar okkar sanna.

Fasteign hf fær öll verkefni án útboðs
Ekkert af þeim nýframkvæmdum sem Sjálfstæðisflokkurinn hefur látið Fasteign hf reisa hér í Reykjanesbæ og síðan endurleigt án þess að nokkur eignarréttur myndist hefur verið boðið út. Fasteign hefur fengið þetta á silfurfati og ákvarðanir hafa verið teknar bakvið luktar dyr.


Nýtt alhliða íþróttamannvirki í Mosfellsbæ á miklu betri kjörum
Lækjarhlíð í Mosfellsbæ er nýtt íþróttamannvirki í Mosfellsbæ sem Nýsir hf reisir og rekur en Mosfellsbær leigir. Í þessari íþróttamiðstöð er bæði inni- og útisundlaug, íþróttahús og líkamsrækt ásamt annari aðstöðu.

Mosfellsbær bauð þetta verkefni út og vann Nýsir hf þá samkeppni en Fasteign tapaði þar sem Nýsir hf bauð besta verðið og bestu gæðin. Fasteign hf hefur reyndar ekki fengið eitt einasta verkefni að undangegnu útboði, í öllum útboðum sem Fasteign hf hefur tekið þátt í hafa þeir beðið lægri hlut fyrir öðrum Fasteignafélögum og ekki fengið verkefnin skv. mínum upplýsingum.

Mosfellsbær leigir Lækjarhlíð af Nýsir fyrir u.þ.b. 12 % lægra verð en Reykjanesbær leigir t.d. nýju innisundlaugina á af Fasteign. Þá er reyndar ekki öll sagan sögð, því Nýsir sér um allt viðhald á mannvirkinu, líka á öllum kerfum innanhús og utanhús, þá sér Nýsir um að greiða allar trygginar og fasteignagjöld en hlutafélögum ber að greiða fasteignagjöld þó svo að fasteignin sé grunnskóli eða íþróttamannvirki. Því er það rangt sem sumir illa upplýstir sjálfstæðismenn hafa haldið fram hér á vefsíðum Víkurfrétta að fasteignagjöld eigi ekki að vera með í útreikningum.


Ábyrgð fylgir innkaupum fyrir opinbert fé og ætíð skal leita bestu kjara
Kjörnum fulltrúum almennings ber skylda til að tryggja að ávallt sé leitað bestu kjara við innkaup opinberra aðila. Reynsla okkar sl. 4 ár í Reykjanesbæ sýnir að alls ekki hefur verið leitað bestu kjara og hafa margir verktakar hér í bæ sopið seiðið af því.

Eysteinn Jónsson skipar 2. sætið á A-listanum