„Evrópumálin eru pólítík“

Þetta sagði Halldór Ásgrímsson, utanríkisráðherra, á opnum fundi framsóknarfélaganna í Reykjanesbæ í kvöld.
Fjöldi manns var á fundinum þar sem Halldór fjallaði meðal annars um efnahagsmál, Kárahnjúkavirkjun og Evrópumálin.Evrópumálin tóku mikið pláss á fundinum, enda má segja að Halldór hafi síðustu mánuðina komið umræðunni um það hvort Ísland ætti að ganga í Evrópusambandið eða ekki, verulega í gang. Hann sagði að Evrópusambandið væri alltaf að stækka og þeim þjóðum sem stæðu utan þess að fækka. Hann sagði ákvörðunina um að ganga í Evrópusambandið eða ekki, vera langstærsta ákvörðunarmál þjóðarinnar þegar horft væri til framtíðar, og að hann sem utanríkisráðherra, gæti ekki látið vera að ræða um þau mál. Halldór sagði Ísland vera að verða veikara innan evrópska efnahagssvæðisins og því þurfi að ræða þessi mál og hann fagnar þeirri umræðu sem komin er af stað í þjóðfélaginu í dag, en sagðist jafnframt ekkert ætla að kveða upp um það hvað gert verður í þessum málum.
„Það þarf að ræða kosti þess að ganga í Evrópusambandið og gallana líka, það þarf að vanda ákvörðunina á hvorn veginn sem hún verður og það þarf líka að vanda umræðuna", sagði Halldór á fundinum í kvöld.
Eftir framsögu utanríkisráðherra voru fyrirspurnir og notfærðu fundargestir sér það.

Hér fyrir neðan eru myndir af fundinum.