Enn um málefni Heilbrigðistofnunar Suðurnesja

Undiritaðar fyrir hönd þeirra félaga sem við störfum fyrir þökkum framkvæmdastjóra HSS  fyrir greinargóð svör við spurningum okkar.

Að vilja endurskoða, breyta og bæta það sem vel er gert er jákvætt og Suðurnesjabúar hafa metið það sem vel er gert á Heilbrigðisstofnun Suðurnesja.  Vel unnin störf starfsfólks hafa ætíð verið þökkuð bæði hátt og í hljóði. Gjafir til stofnunarinnar bera líka með sér hlýhug og þakkir.

Opið bréf til forstjóra HSS varð til í framhaldi af skrifum forstjóra um hugsanleg niðurrif á skurðstofum, í framhaldi af þeim skrifum vöknuðu spurningar um framtíð HSS.

Það er því eðlilegt að spyrja  hvort að ekki verði í framtíðinni þjónusta hér eins og  til dæmis á Heibrigðisstofnun Suðurlands þar sem skurðaðgerðir eru gerðar 3 daga í viku og framundan þar endurbætur sem veita meiri þjónustu, ef dæma má það sem hægt er að lesa á heimasíðu þeirra.  Samkvæmt þeim upplýsingum sem við höfum eru fjárveitingar til HSU og HSS nokkuð sambærilegar.  Það skiptir ávallt máli hvernig við forgangsröðum og vinnum úr því sem við höfum handa á milli.  Því leggjum við áherslu á að  niðurrif á  skurðstofum komi ekki til greina, horfum til framtíðar og þess sem við viljum sjá hjá okkur. Við teljum að stefna beri að aukinni  skurðstofuþjónustu til öryggis verðandi mæðrum og annarra sem þurfa á aðgerð á skurðstofu að halda.

En þrátt fyrir niðurskurð og þess að forgangsraða þarf í rekstri teljum við að vinna þurfi að því að ná meiri stöðugleika er varðar viðveru lækna hér. Stefna ber að því að hver og einn geti valið sinn heimilislækni.  Það getur verið erfitt að ná til læknis í dag og enn erfiðara er að hitta sjaldan eða aldrei sama lækninn.

Einnig væri mikilvægt að allar verðandi mæður gætu sótt meðgönguvernd til HSS
það er að þjónustan sé bæði  til heilbrigðra fæðandi kvenna og þeirra sem eru í áhættumeðgöngu.  Að þurfa að fara í skoðun og fæðingu til Reykjavíkur kostar bæði tíma og peninga og veldur oft óöryggi.   Stefnum áfram á að hér sé gæða fæðingardeild, sem allar verðandi mæður geta treyst og þar líkt og nú sé horft til öryggis móður og barns.

Hvað varðar skurðstofur er það umhugsunarvert hvers vegna svæfingarlæknar á LSH vilja ekki vinna á skurðstofum HSS og sækja þarf svæfingarlækna til Svíþjóðar.

Við ættum einnig að spyrja “ Hvenær verður gengið of langt í vinnuálagi á lækna og starfsfólk  Landspítalans”.  Við heyrum í dag að þar sé komið langt yfir þolmörk varðandi álag á allt starfsfólk og húsnæði.  Þarna þarf að leita annarra lausna en þeirra að leggja af þjónustu á landsbyggðinni og beina henni til Reykjavíkur.  Væri hægt að horfa til þess að minni háttar aðgerðir sem unnar væru á landsbyggðinni, gætu minnkað álag á lækna og starfsfólk LHS og með því væri jafnframt unnið að betri nýtingu á húsnæði og aðstöðu  á landsbyggðinni?

Eitt er það í skrifum forstjóra, sem við hnutum um, en það er að kannski sé ástæða þess að læknar standi hér stutt við eða sækji alls ekki hingað, sé að Suðurnesjabúar með dylgjum eða því að taka ekki vel á móti dýrmætu “aðkomufagfólki”  þá fælum við lækna frá okkur og það geri það frekar að verkum að fólkið tekur ákvarðanir “með fótunum”.

Ljótt er ef satt er.  Við þekkjum hins vegar ekki annað en að öllu aðkomufólki, jafnt sem aðkomufagfólki sé tekið fagnandi, öllum sem hingað koma og hér vilja búa og/eða starfa.

Við alla starfsmenn HSS viljum við segja;  Við eigum samleið fólkið hér á Suðurnesjum og þið sem vinnið fórnfúst og mikilvægt starf á erfiðum tímum, að byggja hér áfram upp góða heilbrigðisþjónustu og bæta hana ef þess er nokkur kostur. Vinnum saman, finnum nýjar lausnir og virðum hvert annað í tali og skrifum.

Þorbjörg Pálsdóttir, formaður SHS.                                                      

Jórunn Alda Guðmundsdóttir, varaformaður FEBS.