Einar í 4. sæti – Engin vettlingatök

Mig langar til að segja ykkur frá því hvað ég stend fyrir. Hver gildi mín eru. Ég býð mig fram í 4. sæti í prófkjöri Sjálfstæðisflokksins. Val kjósenda stendur milli margra öflugra frambjóðenda. Sama hve við keppumst við að segja hvað við höfum gert, hvað við viljum gera og koma með nýjar hugmyndir, þá snýst val ykkar á endanum um það hvaða mann við höfum að geyma.

Ég hef mestalla mína tíð verið á sjó, þó ég hafi síðustu árin verið í landi. Fyrst var ég háseti, svo stýrimaður og loks skipsstjóri með minn eigin bát. Þó ég kunni vel við mig á sjónum finnst mér alltaf gott að sjá til lands og hafa mið eða leiðarljós. Vegna þess hef ég alltaf haft gaman að vitum og á marga litla vita í skápum og hillum heima. Á sama hátt hef ég gildi í lífinu sem eru mitt leiðarljós, vitinn minn í því sem ég tek mér fyrir hendur.

Gildin mín eru vinna, traust og heiðarleiki. Það sem er mér dýrmætast í lífinu eru fjölskyldan og tækifærið til að vinna og hafa áhrif á umhverfi mitt. Þetta hefur verið mitt leiðarljós í bæjarstjórn síðustu fjögur árin.

Faðir minn sagði alltaf að vinnan væri móðir alls, það var hans lífsmottó. Það þýðir ekki bara að allir þurfi atvinnu til að fæða og klæða fjölskylduna. Þetta þýðir líka að allt krefst vinnu. Ekkert gerist af sjálfu sér. Það á jafnt við um barnauppeldi og að byggja upp atvinnutækifæri. Ef menn leggja sig ekki alla í verkefnið verður árangurinn eftir því.

Sjálfur hef ég reynt að lifa eftir þessari lífsspeki föður míns, enda var ekki nóg með að ég fengi þessa innrætingu í uppeldinu heldur var ég líka með honum til sjós og þar komst enginn upp með vettlingatök. Ég hef lagt mig fram af öllum krafti í þeim verkefnum sem ég hef tekið mér fyrir hendur í bæjarstjórn síðustu fjögur ár og vonast til að fá ykkar stuðning til að vinna áfram að málefnum bæjarins. Þar duga heldur engin vettlingatök.

Einar Þ. Magnússon
Bæjarfulltrúi og formaður Atvinnu- og hafnaráðs