Dauðaslys í Reykjanesbæ

Ég er harmi sleginn yfir þeim atburði sem átti sér stað kl. 17.12 sl. föstudag, þegar 4 ára drengur varð fyrir óþekktri bifreið við Vesturgötu og lést af þeim völdum.
Hugur minn og bænir okkar allra eru hjá aðstandendum.

Þrátt fyrir mikið umferðaröryggisátak Reykjanesbæjar og  lögreglu undanfarin misseri sýnir þetta sorglega slys að það hefur ekki náð að útloka svo hörmulega atburði. Ég ber samt þá von að vel á 2. hundrað hraðahindranir sem settar hafa verið upp á síðustu 4 árum, takmörkun á hámarkshraða í íbúagötum í 30 km, umferðaröryggisátak í byrjun hvers skólaárs, ókeypis strætisvagnar, sem m.a. er ætlað að fækka göngu barna á hættulegum umferðaræðum, og harðara eftirlit lögreglu og viðurlög við hraðaakstri, hafi dregið úr alvarlegum slysum í bænum okkar. Í framtíðarsýn Reykjanesbæjar fyrir næstu fjögur ár er markið sett á “slysalausa sýn”. Við tökum það markmið öll mjög alvarlega.

Samt gerast slysin eins og þessi hræðilegi atburður sýnir - og enn er verið að skipuleggja hraðahindrandi aðgerðir. Óvarlegur akstur ökumanna virðist seint vera stöðvaður með því að höfða eingöngu til skynsemi eða mannúðar þeirra.  Og þótt að ökumenn fari varlega geta slysin gerst.

Okkur er ljóst að þeim sem telja hraðahindranir mikilvæga lausn gegn umferðarhraða þykir samt ekki ganga nógu hratt að koma þeim fyrir.

Vandi umferðarsérfræðinga er m.a. fólginn í að tryggja að hraðahindrandi aðgerð á einum stað leiði ekki til meiri slysahættu á öðrum stað. Vesturgata er ein þeirra gatna þar sem ítrekað hefur verið bent á hættur af hraðaakstri og óskað eftir því að hraðahindranir verði settar upp. Við höfum rætt um lausnir við íbúa og aðgerðir við neðri hluta Vesturgötu, frá Hafnargötu að Hringbraut hafa verið í undirbúningi. Á framkvæmdaáætlun vorsins er að setja ljósastýringu á gatnamót Vesturgötu og Hringbrautar og hraðahindrun á Vesturgötu milli Kirkjuvegar og Hafnargötu. Vesturgata er tengibraut á milli þessara tveggja stóru umferðaræða og  augljóst að hraðahindranir þar vísa umferð annað sem vel þarf að huga að.  Við tengibrautir í gömlum hverfum Keflavíkur eru því miður innkeyrslur að íbúðahúsum og slysahætta því meiri en annars væri.

Þessi hræðilegi atburður skal verða til enn árvökulli baráttunni fyrir betri umferðarmenningu. Í rökkri og óveðri þessarar tíðar er afar mikilvægt að fatnaður barna og fullorðinna sé með glitmerkingum, að hraði sé stöðvaður með beinum aðgerðum s.s. hraðahindrunum og háum sektum til þeirra sem brjóta umferðarlögin.

Í kjölfar ítarlegrar umferðartalningar sem staðið hefur yfir frá því í sumar, er fyrirhugað að halda fund með íbúum í lok janúar þar sem niðurstöður eru kynntar, farið yfir hraðahindrandi aðgerðir í öllu bæjarfélaginu og grunnur lagður að frekari aðgerðum í samstarfi lögreglu og bæjaryfirvalda.

Bæjaryfirvöld munu gera allt til að flýta skynsamlegum aðgerðum til að draga úr umferðarhættum enn frekar og ég veit að foreldrar, lögregla og ökumenn munu heldur ekki láta sitt eftir liggja til að hindra að svo hræðilegur atburður endurtaki sig.

Árni Sigfússon,
bæjarstjóri.