Dapurt Kjartan, - dapurt

Það er slæmur siður þegar einstaklingar reyna stöðugt að meta eigin ágæti og afstöðu út frá skoðunum og viðhorfum annarra einstaklinga. Enn verra er að reyna að upphefja sjálfan sig á kostnað annarra. Þrátt fyrir að samanburður við annað fólk sé okkur öllum eðlislægur og sjálfsagður þá er jafnan best að hafa slíkan samanburð fyrir sig sjálfan en dæma eða láta dæma sig á eigin forsendum, af eigin skoðunum og af eigin verkum.

Gott kynningarstarf bæjarstjóra
Í gærkvöldi birtist grein eftir bæjarfulltrúa Kjartan Má Kjartansson á vef Víkurfrétta þar sem hann reynir að gera lítið úr ummælum Árna Sigfússonar bæjarstjóra í föstudagsblaði Morgunblaðsins og lætur líta út fyrir að Árna finnist fátt um markverða staði fyrir ferðamenn í Keflavík og Njarðvík.

Sjálfsagt má segja sitthvað um okkur öll sem tilheyrum bæjarstjórn Reykjanesbæjar og undanskil ég hvorki sjálfan mig né bæjarstjóra í þeim efnum. Hitt get ég þó ekki tekið undir að bæjarstjóri hafi gert lítið úr hrifningu sinni á Reykjanesbæ og þeim kostum sem hér er að finna. Fáir ef nokkrir, hafa á seinni árum, gert Reykjanesbæ jafn hátt undir höfði og Árni Sigfússon bæjarstjóri, hvort sem um er að ræða viðtöl í blöðum eða ljósvakamiðlum. Bæjarstjóri hefur verið óþreytandi við að koma fram í þeim tilgangi að benda á kosti þessa svæðis með það að markmiði að draga hingað að ný fyrirtæki, íbúa eða ferðafólk. Um þetta held ég að flestir geti verið sammála.

Samanburður Kjartans Más
Sú aðferðarfræði Kjartans að upphefja sjálfan sig á kostnað annarra er í sjálfu sér ekki ný af nálinni. Frægar eru auglýsingar frá síðustu kosningabaráttu þar sem birtar voru myndir af Kjartani ásamt myndum af frambjóðendum annarra flokka undir fyrirsögninni "Hvern vilt þú ?" sem væntanlega átti að sýna fram á mannkosti framsóknarmannsins umfram hina sem birtar voru myndir af til samanburðar.  Mér er til efs að slíkar auglýsingar birtist mikið oftar.

Farðu á eigin forsendum
Eftir slælega útkomu Framsóknarmanna í síðustu kosningum, undir þinni forystu, Kjartan Már, er skiljanlegt að þú teljir nauðsynlegt að láta meira á þér bera í daglegri umfjöllun. Ég hvet þig hins vegar til þess að gera það á eigin forsendum í framtíðinni í stað þess að reyna að auka þinn veg á kostnað annarra. Til þess áttu að vera fullfær.

Böðvar Jónsson
bæjarfulltrúi