D-listinn setur manngildið í öndvegi

D-listinn gengur fram til þessara kosninga undir kjörorðinu “Við færum orð í efndir”. Þar er vitnað til þess að öll helstu stefnumál D-listans við síðustu kosningar hafa verið efnd á því kjörtímabili sem nú er að ljúka. Áhersla er lögð á að ný forysta D-listans muni með sama hætti færa orð sín í efndir, segir í frétt frá Sjálfstæðisflokknum í Reykjanesbæ. Talsverðar breytingar hafa orðið á framboðslista D-listans frá því í síðustu kosningum og ber stefnuskráin þess merki um leið og hún byggir á sterkum grunni verka undangenginna ára.

Í stefnuskránni kemur fram umfjöllun um helstu málaflokka er varða uppbyggingu sveitarfélaga, svo og helstu áherslur í hverjum málaflokki, s.s. í fjölskyldu- og skólamálum, atvinnumálum, umhverfis- og skipulagsmálum, málefnum aldraðra, heilbrigðismálum, menningarmálum, tómstunda- og íþróttamálum og skilvirkari stjórnsýslu.

D-listinn leggur setur manngildið í öndvegi í fjölskyldu- og félagsmálum. Settur er fram verkefnalisti um aðgerðir sem bærinn getur unnið til að stuðla að auknu heilbrigði og hamingju barna, unglinga, fjölskyldna og einstaklinga í bænum.

Í skóla- og menntamálum er lögð áhersla á að líkt og áhersla var á að gera aðbúnað grunnskólanna hinn besta á landinu á síðasta kjörtímabili, verði nú unnið með starfsfólki og foreldrum af sama metnaði að innra starfi skólanna. Stofnaður verður Þróunarsjóður leikskóla og grunnskóla. Mikil áhersla verður lögð á að skapa börnum góða þjónustu að loknum hefðbundnum skóladegi eftir hádegi, með samþættum tilboðum í listastarfi, tómstundum, íþróttum og aðstoð við heimanám (Heilsdagsskóli)

Á meðal nýjunga í þessum málaflokki má nefna áherslu D-listans á að háskóladeildir verði starfræktar í Reykjanesbæ, og lagðar fram tillögur um áhugaverð verkefni sem munu geta stuðlað að því.

“Umhverfisvænn orkugarður” er nýtt baráttumál sem D-listinn setur á oddinn í atvinnumálum. Þar er um að ræða verkefni sem tengja einkar vel saman atvinnumál, umhverfismál og menntamál. Áhersla verður lögð á að byggja upp atvinnu- og vísindasvæði þar sem sérhæfing á sviði umhverfisvænnar orku mun skapa hundruð nýrra atvinnutækifæra þegar fram í sækir og efla tækni- og háskólamenntun á svæðinu.

Þá verður haldið áfram að laða að áhugaverð atvinnutækifæri tengd góðri hafnar- og iðnaðaraðstöðu í og við Helguvík. Minnt er á að sá árangur sem þar hefur þegar náðst hefði ekki gerst án forystu bæjarfulltrúa sjálfstæðismanna.

Meðal nýmæla í þessum málaflokki er aukin áhersla á heilbrigðisþjónustu sem atvinnugrein og skipulagt verður átak í að laða ferðamenn inn í bæinn.
Með framangreindum hætti er fleiri styrkum stoðum rennt undir atvinnulíf í bænum sem einnig stuðlar að fjölbreyttari menntunartækifærum.

Í stefnuskránni er kynnt spennandi hugmynd um uppbyggingu við Fitjar sem útivistarsvæðis, ný aðkomuleið í bæinn og ný svæði undir íbúðabyggð og þjónustu. Þá eru kynntar nýjar hugmyndir til að ná skjótar árangri í endurbótum á skipulagssvæðum, s.s. við Hafnargötu. Stefnt er að því að skipuleggja nýtt þjónustusvæði í þágu aldraðra þar sem forgangsverkefni verði nýr þjónustukjarni og dvalarheimili.

Í menningarmálum er sett fram sú tillaga að samnýta fjármagn sem hugað hefur verið að til byggingar tónlistarskóla, til gerðar Listamiðstöðvar þar sem auk skólans verði þá popptónlistarsafn og tónleika- og ráðstefnusalur.
Þá er lögð áhersla á áframhaldandi vinnu við að styrkja Ljósanótt í sessi, Duus- húsa svæðið, varðveita sögu Suðurnejsa og skipuleggja söfn í samstarfi við önnur sveitarfélög á Suðurnesjum.

Til að styrkja enn frekar tómstunda- og íþróttastarf í bænum styður D-listinn hugmyndir um starf gæða- og fjármálastjóra félaganna og vill leita leiða til að auka samstarf við félögin um verkefni í “heilsdagsskóla”, en þar fer saman betri nýting skattfjár, betri þjónusta við grunnskólabörn og styrkari stoðir í rekstri tómstunda- og íþróttafélaga.

Í öllum verkefnum á stefnuskrá D-listans hefur þess verið gætt að fjármagn til framkvæmda sé skynsamlega nýtt og verkefni í rekstri séu unnin af vandvirkni og hagkvæmni. Kynnt er ákvörðun um að koma á kerfi til að mæla árangur í stjórnkerfi bæjarins svo betur sé unnt að fylgjast með framgangi verkefna sem samþykkt er að vinna að.

Hér hafa verið talin fáein verkefni sem D-listi sjálfstæðismanna kynnir í stefnuskrá sinni og hyggst vinna að á næsta kjörtímabili fái hann til þess nægan stuðning.
Stefnuskrána er hægt að fá afhenta á kosningaskrifstofu D-lista sjálfstæðismanna að Hafnargötu 6 í Reykjanesbæ eða lesa á netinu undir vefur xd í Reykjanesbæ

Frétt frá Sjálfstæðisflokknum í Reykjanesbæ