Ávarp formanns Ljósanætur 2005

Kæru íbúar og gestir Ljósanætur. Daganna 1.-4. september mun Ljósanóttin verða haldin hátíðleg í Reykjanesbæ í sjötta sinn. Tilvera hátíðarinnar hefur þegar sannað sig og í dag líta bæjarbúar og gestir á Ljósanótt sem skemmtilegan tíma þar sem fjölskyldan skemmtir sér öll saman í fallegu umhverfi.
Óhætt er að segja að menningarlíf í Reykjanesbæ hafi tekið miklum stakkaskiptum frá fyrstu Ljósanóttinni okkar árið 2000 en nú er svo komið að menningarviðburðir eru því sem næst orðnir daglegt brauð í bænum okkar og Reykjanesbær orðin sannkallaður menningarbær allt árið. Viðtökur bæjarbúa hafa verið frábærar frá upphafi, listamenn á hverju götuhorni farnir að sýna sig og sjá aðra svo ekki sé minnst á þau fyrirtæki og athafnamenn sem nú styðja svo vel við Ljósanótt og allt menningarlíf bæjarins. Fyrir þetta getum við bæði verið stolt og þakklát. Þetta viðhorf og samstaða er einfaldlega að skila sér tilbaka í þeim fjölda sem sækir sér menninguna í öllu því formi sem hún býður uppá.
Í ár, eins og síðustu ár, er lögð áhersla á viðamiklar uppákomur alla dagana þó laugardagurinn verði áfram aðalhátíðardagurinn. Ljósanótt verður í ár sett á fimmtudeginum með nýju atriði en um kvöldið verður það tónlistin sem ræður ríkjum á fjölmörgum skemmtistöðum bæjarins. Nú þegar hafa margir þjóðkunnir tónlistamenn boðað komu sína. Á föstudeginum verður hátíðinni gerð góð skil með menningar- og afþreyingu um allan bæ. Laugardagurinn á Ljósanótt verður eins og síðustu ár með fjölbreyttum atriðum allan daginn, eins og þeir sem sótt hafa Ljósanótt þekkja. Á sunnudeginum er hugmyndin að virkja kirkjudeildir á svæðinu til góðra hluta þar sem gestum verður kynnt starf þeirra á víðum grundvelli með samkomum og góðri tónlist.
Ljósalagið verður að sjálfsögðu á sínum stað. Segja má með sanni að Ljósanótt sé einskonar áramót Reyknesinga en sú hefð hefur þegar myndast að framkvæmdir ársins, bæði hjá einstaklingum og bæjarfélaginu, taka á sig endanlega mynd enda hefur bæjarfélagið tekið miklum stakkaskiptum á síðustu árum. Já tíminn líður og litla hátíðin okkar sem þegar er orðin sex ára hefur bæði stækkað og dafnað með hverju árinu sem líður. Í dag má með sanni segja að Ljósanótt, menningar- og fjölskylduhátíðin okkar í Reykjanesbæ sé án efa orðin ein stærsta og glæsilegasta bæjarhátíð landsins.
Við hlökkum til að sjá þig á Ljósanótt og erum þess fullviss að þú og fjölskylda þín eigir eftir að njóta þín vel á Ljósanótt um leið og þú upplifir þá menningu og skemmtun sem við höfum fram að færa.

F.h. Ljósanæturnefndar,
Steinþór Jónsson, formaður.