Átti að verða aðstoðarverslunarstjóri en var rekin

Ég hef starfað hjá Dominos síðan þeir opnuðu búðina í Keflavík eða í um eitt og hálft ár. Ég lenti í smá vinnuslysi þann 16. desember sl. sem leiddi til þess að ég fékk heilahristing og tognaði í bakinu. Mér var sagt af lækni að halda mig bara heima við næstu daga og hvílast. Þrátt fyrir það fór ég að vinna daginn eftir, því það gat enginn tekið vaktina fyrir mig. Svo tilkynnti ég mig veika næstu tvo daga, (en fór samt niður í búð um hálf tólf bæði kvöldin til að gera upp og loka).

Ég fór svo ekki að vinna aftur fyrr en á Þorláksmessu. Aftur fór ég í vinnu á annan í jólum og alveg fram á fimmtudag. Ég átti að vera í fríi á miðvikudeginum, en þá lenti einn starfsmannanna okkar í bílslysi (utan vinnutíma) og ég fór á Dominos um kl. 21:30 til að klára að loka, gera upp og svoleiðis.

Eftir þetta er ég kölluð inn í Reykjavík á fund. Það var búið að lofa mér fyrir mánuði síðan að ég myndi verða aðstoðarverslunarstjóri í Keflavík og ég hélt náttúrulega að ég væri bara að fara að skrifa undir samninginn, en annað kom á daginn. Ég var rekin!

Eina ástæðan sem mér var gefin fyrir að vera rekin, var að ég sýndi ekki nægilegan áhuga á því að vinna þarna og verða aðstoðarverslunarstjóri.

Ég hef alltaf mætt í vinnu, aldrei fengið áminningar og hef verið að hlaupa í skarðið fyrir alla og ég kann allt þarna í búðinni.

Afhverju er verið að reka fólk sem kann allt og hefur ekkert gert af sér?

Ég er með eina kenningu: Þessi fyrirtæki, sem reka svona staði, vilja bara hafa yngra fólk í vinnu svo þau þurfa ekki að borga þeim eins há laun.

Katrín Aðalsteinsdóttir