Áramótabrenna eða þrettándabrenna?

Sitt sýnist hverjum þegar kemur að því að ræða hvort rétt hafi verið af bænum að fella niður áramótabrennuna eins og gert var nú um áramótin.
Kristmundur Ásmundsson, Samfylkingunni, hóf máls á því á bæjarstjórnafundi í gær að honum fyndist góð hefð vera lögð niður og hann sæi enga ástæðu til að leggja niður gamla siði þó nýir væru teknir upp. Þar átti hann við þá staðreynd að áramótabrennan var ekki haldin, en bærinn stóð síðan fyrir mikilli þrettándabrennu með tilheyrandi skemmtun. Eins hafði Kristmundur orð á því að hafi ákvörðun um þetta efni verið tekin á bæjarstjórnafundi þá hafi hann ekki verið þar. Fleiri bæjarfulltrúar tóku til máls og virtust flestir ánægðir með þrettándabrennuna. Jóhann Geirdal, Samfylkingunni, sagðist þó hafa heyrt á máli fólks að alls ekki allir hefðu verið ánægðir með þrettándabrennuna, sagðist hann hafa frétt af álfum innanum mannfólk í leit að ættingjum og það gæti ekki staðist því álfar eigi enga ættingja í mannheimum. Það er greinilegt að margir hafa saknað áramótabrennunnar í Innri Njarðvík og það er kannski umhugsunsrefni fyrir stjórnmálaflokkana að setja hana inn sem kosningaloforð í kosningabaráttunni sem er framundan.