Apótek Keflavíkur 50 ára

Apótek Keflavíkur tók til starfa 7.febrúar 1951 að Suðurgötu 2, á sama stað og það er enn í dag. Fyrsti lyfsali var Jóhan Gerhard Ole Ellerup. Þann 1. október 1978 tók Benedikt Sigurðsson við rekstri og starfaði til 1. ágúst 1997 er núverandi eigendur tóku við. Fram til 9.ágúst 1984 þjónaði Apótek Keflavíkur öllum byggðum Suðurnesja en þá opnaði Apótek Grindavíkur.
Þó Apótek Keflavíkur hafi alltaf verið á sama stað þá hafa tvívegis verið gerðar umfangsmiklar breytingar á húsnæði og aðstöðu. Fyrri breytingin var gerð árið 1982 en þá var húsnæðið endurbyggt og allar innréttingar endurnýjaðar. Árin 1995-1996 var síðan byggt við húsnæðið Tjarnargötu megin og það búið glæsilegum sérsmíðuðum innréttingum. Aðstaða í Apóteki Keflavíkur er því mjög góð á þessum tímamótum og skapar mikla möguleika í þjónustu. Þannig er snyrtivörudeildin aðskilin frá apótekshlutanum sem er mjög æskilegt vegna t.d. ofnæmis-og astmasjúklinga. Góð aðstaða er til persónulegra samskipta við viðskiptavini og allt rými er mjög gott. Þetta mun vera eina apótek landsins með sérstakt barnahorn fyrir yngstu viðskiptavinina.

Þekking-reynsla-þjónusta
Í Apóteki Keflavíkur starfar fólk með mikla starfsreynslu. Þannig eru 3 elstu starfsmennirnir með yfir 30 ára reynslu. Þetta eru þær Sólveig, Unnur og Þórdís, flestir aðrir hafa starfað í 10 - 20 ár. Starfsmannabreytingar í gegn um árin hafa verið mjög litlar. Það er ómetanlegt að hafa svona traust, gott og reynslumikið starfsfólk til að tryggja sem besta þjónustu.
Fagmennska í fyrirrúmi eru einkunnarorð Apóteks Keflavíkur, en gott starfsfólk, aðstaða og vandað vöruval eru forsendur fyrir því. Upplýsingagjöf um lyf er stór þáttur í starfseminni. Í mörg ár hafa viðskiptavinum Apóteks Keflavíkur staðið til boða blóðþrýstingsmælingar sem er mikið notað. Á síðasta ári hófust mælingar á blóðsykri, sem hefur gefið góða raun og hafa nokkrir einstaklingar með of háan blóðsykur fundist. Lyfjaskömmtun fyrir sjúklinga í samvinnu við heimahjúkrun hófst einnig á síðasta ári og stendur sú þjónusta öðrum viðskiptavinum til boða. Þá er Apótek Keflavíkur með heimsendingarþjónustu. Stór snyrtivörudeild er í Apóteki Keflavíkur með glæsilegu úrvali ilm-og snyrtivara. Þar starfa bæði snyrti-og förðunarfræðingur.
Ýmsar uppákomur verða á árinu í tilefni 50 ára afmælis Apóteks Keflavíkur, kynningar og ýmiss tilboð sem verða auglýst sérstaklega.

Í tilefni þessara tímamóta verður boðið upp á léttar veitingar í Apóteki Keflavíkur frá kl 14-17 föstudaginn 9. febrúar. Það er von og ósk okkar að sem flestir sjái sér fært að líta við.

Ásgeir Ásgeirsson, Sigurður Gestsson, María Ingólfsdóttir, Ingveldur H.Sigurðardóttir

Vertu velkomin,

Apótek Keflavíkur, Suðurgötu 2