Að lokum eða í upphafi.

Ágætu íbúar Voga og Vatnsleysustrandar!

Það er komið að lokametrunum í þessari kosningabaráttu.

Undanfarnar 8 vikur hafa verið krefjandi og skemmtilegar, við höfum hitt mikið af fólki sem hefur sagt sína skoðun á hinum ýmsu málum er tengjast sveitarfélaginu.

Margar góðar hugmyndir og ábendingar hafa komið og er alveg ljóst að fólk er ákveðið hvað það vill.

Við hjá L-listanum vitum að við getum ekki komið öllum þeim hugmyndum sem komið hafa í framkvæmd, en það er vilji okkar að gera sem flest, ávallt með hag bæjarbúa í huga. Ljóst er að á næstu mánuðum og árum verða verkefnin krefjandi og eflaust þarf að taka stórar og erfiðar ákvarðanir. Stærsta verkefnið er án efa að koma fjárhag sveitarfélagsins í rétt horf, við erum í djúpum öldudal þessi misserin, en eitt er ljóst að öldurnar lægja og þá verður hægt að framkvæma ýmislegt sem kemur íbúum til bóta.

En við hjá L-listanum munum alltaf standa vörð um barnafjölskyldur og einnig þá sem minna mega sín, við munum til að mynda ekki afnema gjaldfrjálsa máltíð í Stóru Vogaskóla, við munum tryggja það að börn geti sótt menntun í grunnskólann án endurgjalds, námsgögn verða frí líkt og kveður um á í 28.grein Barnasáttmála Sameinuðu Þjóðanna.

Hvað varðar eldri borgara þá viljum við efla heilsu með því t.d að styðja við bakið á að eldri borgarar geti sótt Janusarverkefnið.

Umhverfið þurfum við öll að hugsa um, við viljum horfa í kringum okkur og fegra umhverfið, þetta á við um Vogana í heild sinni að meðtalinni Vatnsleysuströndinni og ekki síst Hvassahrauni. Sveitarfélagið er stærra en bara þéttbýliskjarninn.

Við viljum einnig að hér séu gangstéttir sópaðar reglulega og sama má segja um göturnar.

Það er einnig vilji L-listans að hér verði fjölgað ruslatunnum og auðvitað að þær verði tæmdar reglulega.

L-listinn vill einnig að eignum sveitarfélagsina verði viðhaldið og tölum við þá um fyrirbyggjandi viðhald, ekki er nóg að taka bekkina inn þegar þeir eru ónýtir, frekar viljum við að það sé gert áður en þeir skemmast og þannig megi spara pening í viðhald.

Samgöngumál viljum við bæta, við viljum til að mynd koma því á að Vogastrætó fari víðar en bara að gamla pósthúsinu. 

Þá er komið að stóru spurningunni, hvernig ætlar L-listinn að snúa fjárhag sveitarfélagsins við?

Ýmsar leiðir eru til þess, við þurfum að velta öllum steinum og horfa í hverja einustu krónu, ekki halda aurunum og kasta krónunni. Við þurfum að fara varlega í fjárfestingar, en þurfum að sjálfsögðu að fara í þær fjárfestingar sem nauðsynlegar eru. Með öllum mögulegu ráðum þurfum við að snúa rekstrinum við.

Kærú íbúar, ég vil biðja ykkur að nýta ykkur þann dýrmæta kosningarétt sem þið hafið og mæta á kjörstað á kjördag. Ykkar atkvæði skiptir máli.

Það er vilji L-listans, lista fólksins að sveitarfélaginu vegni vel í náinni framtíð og við viljum vera þáttakendur í því og því bið ég ykkur kjósendur að sýna L-listanum þann stuðning og setja X við L á morgun, laugardag, því við ætlum að gera þetta saman og gera þetta vel.