400 ný störf og strætó til Reykjavíkur?

Fyrir skemmstu varð ég þess heiðurs aðnjótandi að fá að fara með hluta þingflokks Framsóknarflokksins í vinnustaðaheimsóknir. Ég fór m.a. í heimsókn til álversins í Straumsvík.

Samkeppnishæf laun og akstur til og frá vinnu
Í álverinu vinna 500 manns og er meðalstarfsaldur 20 ár sem telst mjög hátt og vel á annað hundrað starfsmenn hafa náð 30 ára starfsreynslu. Launin eru að sögn forstjóra Alcan á Íslandi vel samkeppnishæf, en ýmis fríðindi fylgja starfinu. Starfsmenn eiga kost á fari án endurgjalds til og frá vinnu með rútum sem aka um allt höfuðborgarsvæðið.

Þekkingar- og hátækniiðnaður
Ólíkt því sem halda mætti af umræðunni undanfarnar vikur er álframleiðsla þekkingariðnaður sem nýtir sér alla nýjustu hátækni sem sést kannski best á því að hjá álverinu í Straumsvík starfa hátt í 100 manns sem hafa lokið prófi frá háskóla mest í verk-og tæknifræðigreinum. Auk þess starfa á annað hundrað manns sem hafa lokið iðnaðarmenntun eins t.d. bifvélavirkjar, vélvirkjar, rafvirkjar, kokkar, rafeindavirkjar, málarar en svona mætti lengi halda áfram. Þá hafa hátt í 200 starfsmenn lokið prófi frá Stóriðjuskólanum sem veitir þeim tækifæri til frekari starfsþróunar.
Auk alls þessa er rétt að segja frá því að mikið af hámenntuðu fólki selur álverinu sína þjónustu, má þar nefna ýmis konar verkfræðiþjónustu eins t.d. iðnstýringar, þá sér fyrirtækið Anza um rekstur tölvukerfa álversins og starfa að jafnaði 10 - 15 manns fast eingöngu við að þjónusta álverið í Straumsvík. Skemmtilegast við þessa þróun er e.t.v. fyrirtækið STIMIR í Hafnarfirði sem er hátæknifyrirtæki sem sérhæfir sig í þróun og hönnun á framleiðslubúnaði fyrir Álver, en fyrirtækið hefur selt sínar afurðir til álvera um allan heim.

Álverið stækkar; ný atvinnutækifæri fyrir Suðurnesin?
Alcan á Íslandi hefur fengið starfsleyfi fyrir 460 þúsund tonna álveri en í dag eru framleidd um 180 þúsund tonn á ári sem þýðir að álverið í straumsvík mun þurfa u.þ.b. 400 nýja starfsmenn.
Suðurnesin ættu vel að geta fengið stóran hluta þessa starfa. Ekki tekur nema 16-20 mínútur að keyra frá Reykjanesbæ í Straumsvík sem er eflaust skemmri tími en það tekur að keyra frá Straumsvík í Grafarvogin, en Alcan er í dag með ókeypis akstur víða um höfuðborgarsvæðið fyrir sína starfsmenn.
Bæjaryfirvöld í Reykjanesbæ eiga að leita til Alcan um samstarf til að tryggja okkar hlut sem mestan í þessum 400 nýju störfum.

Strætó á klukkustundarfresti milli Reykjanesbæjar og
Reykjavíkur?
Ein forsenda þess að störf í Straumsvík yrðu eftirsótt eru samgöngur milli Reykjanesbæjar og Straumsvíkur. Alcan þyrfti að bjóða starfsmönnum af Suðurnesjum sömu þjónustu og starfsmenn af höfuðborgarsvæðinu fá.
Ef þetta yrði raunin væri hugsanlega kominn grundvöllur fyrir frekari þróun almenningssamgangna milli svæðanna, sem síðan mætti þróa og myndi renna styrkari stoðum undir rekstur strætisvagnaþjónustu milli Reykjanesbæjar og Reykjavíkur en Akranes hefur nýlega tekið upp slíkar samgöngur í samstarfi við Strætó bs með góðum árangri.

Eysteinn Jónsson
Formaður Fulltrúaráðs Fram-
sóknarfélaganna í Reykjanesbæ