Ný tækifæri í Reykjanesbæ

Í gegnum tíðina hafa komið upp fjölmargar hugmyndir um flutning verkefna ríkisins til Suðurnesja til að nýta hér þá aðstöðu sem er til staðar eða hefur verið byggð upp vegna annara verkefna. Á síðustu árum hafa aðstæður í þjóðfélaginu gjörbreyst og forgangsröðun orðin önnur. Á tímum uppgangs og góðæris er tilhneigingin sú að horfa síður í kostnað og forgangsraða á öðrum forsendum. Með breyttum aðstæðum er góður tími til að horfa aftur yfir sviðið og velta því fyrir sér hvort önnur svör verði við spurningum sem áður hefur verið svarað.

Innanlandsflug til Reykjanesbæjar?

Umræða um framtíð Reykjavíkurflugvallar hefur einkennt prófkjörsbaráttu borgarstjórnarflokkanna í Reykjavík. Ljóst er að um mikið hitamál er að ræða en flestir virðast frambjóðendurnir sammála um að völlurinn eigi að fara úr Vatnsmýrinni. Við íbúar Reykjanesbæjar eigum að blanda okkur af alvöru í þessar umræður enda Keflavíkurflugvöllur vel í stakk búinn til að taka við þeirri fjölgun umferðar sem af flutningi innanlandsflugs til Keflavíkur myndi verða. Ljóst er að í ljósi hagræðingakrafna að rekstur eins flugvallar er mun hagkvæmari en rekstur tveggja.

Þjóðhagslegur ábati af flutningi flugvallar um 37 milljarðar

Í úttekt á framtíðarstaðsetningu Reykjavíkurflugvallar sem gerð var af samgönguráðuneytingu og Reykjavíkurborg í apríl 2007 er bent á fjölmarga kosti þess að færa innanlandsflug til Keflavíkur. Aukinn rekstrarkostnaður Keflavíkurflugvallar er óverulegur og þessi lausn er í heild sinni sú sem er hagkvæmust fyrir Ríkið. Gert er ráð fyrir einhverri fækkun farþega við þessa breytingu sem hefur áhrif á flugrekendur og auknum ferðakostnaði þeirra sem nýta sér innanlandsflug en í heildina er þess getið að þjóðhalegur ábati af þessari aðgerð yrði um 37,5 milljarðar króna. Keflavíkurflugvöllur er í minna en 50km fjarlægð frá Reykjavíkurflugvelli sem ætti ekki að vera um of íþyngjandi vegalengd fyrir þá sem nýta sér innanlundsflug.

Styrkja HSS í stað þess að veikja

Huga þarf sérstaklega að sjúkraflugi og bráðþjónustu henni tengdri. Í því samhengi væri nær að endurskoða niðurskurð á HSS og í staðinn stefna að því að efla stofnunina og bráðaþjónustu hennar í tengdslum við færslu innanlandsflugs. Fjömargir nýir tekjumöguleikar eru í boði fyrir HSS tengt öflugri skurðstofu með útleigu á lausum tímum til einkaaðila. Einnig hafa viðræður við Færeyinga og Grænlendinga um samstarf á sviði heilbrigðis- og sjúkrahúss þjónustu verið lengi í farvatninu og ljóst að það væri góður kostur fyrir Íslendinga enda skortur á læknum og hjúkrunarfærðingum í þessum löndum. Á sama tíma er skortur á verkefnum fyrir lækna og hjúkrunarfræðinga á Íslandi og sér í lagi í Reykjanesbæ miðað við síðustu tillögur.
Nauðsynlegt er að skoða þennan valmöguleika af mikilli alvöru áður en við lendum í sömu stöðu og þessi lönd vegna stórfellds brottflutnings fagfólks okkar í greininni vegna niðurskurðar. Forsvarsmenn Reykjanesbæjar eiga að keyra þetta verkefni áfram og hvetja til umræðu um þessa raunhæfu kosti.

Framtíð Landhelgisgæslunnar

Ef yrði af flutningi innanlandsflugs til Keflavíkur myndi starfsemi lanhelgisgæslunnar fylgja með. Þetta tvennt þarf þó ekki að haldast í hendur og því sjálfsagt að skoða þann möguleika að byggja upp framtíðaraðstöðu Gæslunnar í Keflavík. Forstjóri Landhelgisgæslunnar hefur látið hafa það eftir sér við fjölmiðla að aðstaða fyrir flugflota Landhelgisgæslunnar á Reykjavíkurflugvelli sé óviðunandi. Keflavíkurflugvöllur er best búni flugvöllur landsins. Hann er nærri stórum hluta af fiskihöfnum landsins en siglingaleiðir að og frá þeim er ákjósanlegur kostur í björgunarstarfi gæslunnar. Á Keflavíkurflugvelli er auðsótt að búa flugflota Gæslunnar þá aðstöðu sem þörf er á. Einnig er gott rými fyrir þyrlusveit gæslunnar. Aðalbækistöðvar þeirra væru þá í Reykjanesbæ en ein þyrla væri staðsett norðarlega á landinu til að auka viðbragðshraða. Skip Landhelgisgæslunnar gætu svo fengið lægi í Helguvík eða Keflavíkurhöfn.

Að lokum

Hér að ofan hef ég reifað hugmyndir sem hafa komið upp á síðustu árum en ekki fengið brautargengi. Þetta eru raunhæfar hugmyndir sem annað hvort auka rekstarhagræði eða skapa nýjar tekjur. Breyttar aðstæður kalla á endurskoðun og þá umræðu á bæjarstjórn Reykjanesbæjar að leiða. Nauðsynlegt er að einblína ekki um of á vandamálin heldur horfa í lausnir og leita leiða til að búa til ný tækifæri í Reykjanesbæ í þeim tilgangi að búa til fjölbreytta atvinnustarfsemi til framtíðar í.

Höfundur býður sig fram í 4-6 sæti í prófkjöri Sjálfstæðisflokksins í Reykjanesbæ 27. febrúar næstkomandi.

Jóhann Snorri Sigurbergsson