Laussvæfir geitungar á útmánuðum

Borið hefur á því að geitungar hafi rumskað af vetrarsvefni nú á útmánuðum 2010 í meiri mæli en áður hefur vitnast en slíkt svefnrask hefur heyrt til undantekninga á þessum árstíma. Er einstök veðurblíða ástæðan eða er orsökin sú að óvenju margar drottningar bíða nú vorsins? Það mun væntanlega koma í ljós í sumar.

Nú þegar hafa Náttúrufræðistofnun Íslands borist átta tímasettar tilkynningar um árrisula geitunga og hafa eintök fylgt fimm þeirra. Þau reyndust öll vera holugeitungar (Vespula vulgaris), drottningar að sjálsögðu því einungis slíkar sofa yfir vetur til komandi vors. Einnig hefur heyrst af fleiri ótímasettum og óstaðfestum tilvikum.

Sjá nánar á vef Náttúrufræðistofnunar Íslands hér.